Questo post é stato letto 20190 volte!
Estate, tempo di mare e di vacanze. Quante sensazioni di ebrezza e di gioia facendosi dondolare dalle azzurre onde che ci temprano dalle fatiche della vita:
OH MARI….
Oh mari si sapivi tu parrari,
cu sapi quantu cosi mi dicivi,
ndavivi tanti stori di cuntari,
potivi centu libri pemmi scrivi.
Pagini di spartenza e di duluri,
di povereddi in cerca d’avveniri,
capituli chi parranu d’amuri,
di cori nnamurati e di suspiri.
Colonn’e righi chi non hannu fini,
scritti cu nchjostr’i sciali e patimenti.
Giri lu mundu tu senza confini,
scurri cu ttia a vit’e tanta genti.
Omini retti e cuntrabbanderi,
navicatur’i tutti li staggiuni,
barchi di lussu cu farsi banderi,
gentagghja senza patria né patruni.
Genti chi fuji da li so’ sventuri,
trattati a malu modu peju di cani,
facci brusciati di niru culuri,
senza certezzi pe lu so’ domani.
Si tenneru pe ccù cerca nu pani,
ma nte fundali toi non nc’è taverna.
Suduri duni all’omu e cadd’e mani,
a tanti cristi seportura eterna.
E ssi è propriu longu lu to jiri
e la grandizza toi non avi gguali,
a tanta genti tu porti sapiri,
castigu spargi a ccù ti voli mali.
Oh mari senz’e tia non sacciu stari
e l’unda toi lu passu meu cunduci.
E’ beddu nta la ribba caminari,
a pedi scazzi sentiri la to vuci!
Rocco Criseo
Questo post é stato letto 20190 volte!
