Questo post é stato letto 11040 volte!
‘Nu jorn’i stati, mentri passijava,
mi vinni ‘i ‘mbuccu a strata d’a Ranghìa,
ed ogni passu arretu mi portava
e ‘nu ricordu a’ ‘mmenti mi venìa.
Li petri eranu tutti ‘nvirdicati:
a ‘nsilicata di la vecchja via.
Quanti mammi dassaru li pedati
e quanti ca’ langella li seguìa!
Sbattìa li ferra a trotta lu sumeri
cu’ li barillhi ‘i supra carricatu.
Volìa m’i ‘rriva prest’a lu biveri
m’i ‘mbivi tantu e m’esti sazzijatu.
Scrusci sulagna e sembra currivata,
a la surgenti, l’acqua d’a Ranghìa;
funtana dill’antichi tant’amata,
parìa ca ciangi comu la vidìa.
La petra aundi cadi è cunzumata,
posava llhà a langella cu’ linchjìa;
pari ‘na mamma, ora ‘bbandunata
di li figghjoli randi chi criscìa.
Sutt’a ‘nu tettu fattu di lamèri,
all’umbra di ‘na cerza seculari,
risisti ancora ‘ntattu lu biveri
cu’ li ricordi di li cosi cari.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 11040 volte!
