Questo post é stato letto 9800 volte!
Tavuli rutti, petra ncatastata,
hinestri perti, resti di carvuni,
landi rruggiati, mmorza di cervuni
e ttanta puzza d’aria mucata.
I genti ccà venenu a ndinocchjuni
pammi ponnu buscari na pizzata.
A serva si dicia; “Veniti mata,
ora staci dormedu u me’ patruni”.
Ora sta casa è tutta bandunata:
eppuru ‘na vota ccà stava u Baruni!
ndavia rosi e hhjuri a stu barcuni
e guardiji ntornu c’a scupett’armata.
‘A genti chi venia cc’à stu portuni
stava di modu chi paria mmagata;
pammi poti ndaviri ‘na vuccata,
si cacciava cappeglju e pantaluni.
Ora cu’ passa hà na…surlazzata
comu si nentu hussi, a stu scaluni,
e ddici a hacci d’iglju,mascarzuni,
chi ttuttu ndi volja pa na mangiata.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 9800 volte!
