Questo post é stato letto 9490 volte!
E’ la festa della REPUBBLICA ITALIANA!
U DDUI GIUGNU DU 46
Dopu vint’anni di patimi e stenti,
di lotti fraticidi senza pari,
finut’a guerra e li bumbardamenti,
a genti, speranzusa, jiu a votari.
U populu italianu fu chiamatu,
mi scegli prest’e bonu la so’ via,
comu voliva m’esti guvernatu:
repubblica oppuru monarchìa!
Voliva ancora a testa curunata,
di li Savoia e li so’ paladini,
o na costituenti nominata,
cu la consulta di li cittadini?
Fu mpicciu chistu duru da sbrogghjari,
nto nord u votu fu repubblicanu,
u sud ‘nveci non gradìu cangiari,
i brachi si calau pe lu sovranu.
Ḍḍà genti ssoggettata a li baruni,
non eppi certu libertà di menti,
si fici cumandari di patruni,
fu forti l’intrallazzu di potenti.
Dopu jornati nteri di cunteggiu,
cu scialatin’i ll’una e i ll’atra parti,
si ncuminciava già a pensar’o peggiu,
pariva com’o jocu di tri carti.
Apói la repubblica vincìu.
Votaru pur’i fimmini…cuntenti!
U Re Savoia lestu si ndi jiu,
l’Italia eppi u primu presidenti.
E vola oji lu triculuri e celi,
pe ḍḍà jornata ormai cusì luntana,
si canta a coru l’innu di Mameli,
è festa da Repubblica Italiana!
Rocco Criseo
Questo post é stato letto 9490 volte!
