Quand’u Signuri ‘u mundu costruìu,

dopu sei jorna Igliu si riposau.

Però non sacciu undi nci juriu,

faci l’omu chi tuttu spasciau.

Ma penzati quant’è bbonu Ddiu:

vitti Adamu sulu e meditau.

‘Na bbella donna Igliu cuncepiu,

e llestu lestu ‘nci la rrigalau.

‘A donna tuttu quantu poi spasciau,

ca rrinnegau l’ordini di Ddiu:

cu ffogghi di ficara si mmucciau’,

pe’ la grandi virgogna chi faciu!

Si fici cumbinciri du serpenti,

chi nci cuntava cosi stravaganti:

nci ntulupava ca igli nda nnenti,

‘u stessu Ddiu parivanu ‘mportanti.

Comu ‘na scecca tirata ‘i capizza,

supr’ a pumara llongau li bbrazza:

l’omu perdiu cusì la cuntentizza,

pa’ fimmana, pe’ cchista mala razza.

Ma pensandu com’è strana ‘a vita,

di voti tantu bbrutta e sciagurata,

cunsigghiu l’omu pemmi si marita,

si vvoli passa ‘o cardu la nottata!

Senza da donna nenti vali ‘a vita,

ed è pe’ cchistu chi fu perdunàta:

‘ndavi li carni lisci comu sita,

non esti cchiù ‘na rrazza jastimàta.

Pa’ donna malucori non tenimu,

‘sti quattru jorna chi tutti campàmu:

cchiù si `mbicina e cchiù beni ‘a volimu,

e po’ peccatu, mi sa futti Adamu.

 

 

Tratto dall’antologia “Vuci Senza Tempu”,

Unione Poeti Dialettali Calabresi