Chi burdèllu, ‘ndo paìsi!
‘A genti parra, faci e dici.
Tutti parenti, cumpàri e amici,
ma dura sulu pi ‘stu misi!

‘A muntagna e ‘a marina,
cu’ poti, ti ‘mbicìna.
Mi purtài all’elezioni!
Oh cumpàri, ‘a disposizioni!

V’u prumèttu solennementi:
comu ‘nchianu, ‘rriva l’acqua!
Bella frisca, d’a sorgenti.
Ma poi si cunfùndunu cu l’acca…

Nenti fossi ammenzu ‘i schrati,
né mundìzza ‘ndo paìsi,
cugghìmu puru ‘i schraci.
M’a viu jeu, si mi vutàti!

Si st’amicu favorìti,
non vi nd’ât’a ‘ncarricàri:
tuttu chiddhu chi vulìti,
‘u putìmu sistemari.

Quantu tempu, me’ cumpàri,
comu mai mi vinìsti ‘a truvàri?
Elezioni comunali,
non liggìstuvu ‘i giornali?

Si vi pozzu disturbari,
‘nu favùri v’haiu ‘a cercàri.
‘Nta scheda elettorali,
‘u me’ nomu ât’a signàri!

Oh cumpàri, già ‘u sapìti,
non c’è bisognu m’u dicìti:
cu ‘sta scusa d’u sangiuvanni,
mi futtìti tutti l’anni!

Elezioni comunali.
Mi nd’avìssiru ‘a sciorbàri,
si non votu a me’ cumpàri!

di Natino Tripodi

• Sonetto per un ragazzo padre
• Sentia tanti storielli ntà me vita…
• Poesia: Al solario d’ottobre
• Pisaniello (IDV): “Presenti in Calabria come in Emilia Romagna”
• Poesia: Di un ritrovamento di libertà