Questo post é stato letto 22610 volte!
versi e musica di Fortunato Sindoni:
Si mi susteni u sensu e la raggiuni
e lu me cori non mi fa ‘mpedimentu
cantu lu tempu di quandi li “gnuri”
vulivanu servi la povira genti!
Strisciava a mafia arreri ‘e so patruni,
serpi affamata cu vilinusi denti
spittandu calma lu giustu mumentu
p’approfittari pu so giuvamentu!
A Caulonia di luntanu tempu
tirava avanti stu nefandu andazzu;
stintava assai u poviru scuntentu,
pi prepotenti era un gran sollazzu!
A liggi non sintia stu lamentu
e pattiava cu chiddi du palazzu!
Forti chi debbuli p’apprufittari,
chi forti debuli pi s’allisciari!
A guerra fici i cosi piggiurari.
Poti mai a guerra fari carchi beni?
Pi puvareddi, in particulari,
s’assummanu la fami e li peni!
Così la vita non poti durari:
assuggittati a sti tinti jeni!
Cu teni assai si l’havi a spartiri
cu puvareddu ca sta pe muriri!
Così gridava, senza scantu aviri,
pi nostri tempi jeni un casu raru;
un veru omu d’animu gintili,
lu canusciti: jeni Cavallaru!
Di prutistari non volia finiri,
puru pi chistu poi l’arristaru.
La vostra menti,mi dici l’istintu,
vola a ddi jorna du quarantacincu!
Lu fattu in tanti modi fu dipintu:
cu scrissi niru e cu scrissi jancu,
ndi po’ parrari mali cu ndi vinni vintu,
lu vantò assai cu ci spirava tantu!
Lu cantastorie nni jeni cunvintu
ca pi Caulonia resta un grandi vantu,
dandosi forti pi prima na mossa
desi all’Italia a Repubblica Rossa!
Nta tutt’Italia si sentìu na scossa,
c’è cu pinsò: “Ccà ndi fannu fissa!
Firmamu, prestu,prima ca si ‘ngrossa
stu cumunismu sinnunca ‘nd’ abissa!
S’ u populu, ca scusa da riscossa,
si svigghia finalmenti di sta lissa,
nni fa pagari tutt’ i cosi storti
pi comu li tinimu a mala sorti!
Li fatti furu tanti e u dicu forti:
non eppi sempri giustizia a so parti.
C’è cu n’apprufittò pi dari morti
e pi lavari l’onuri ‘e so fatti!
Ma nti di jorna l’animi su ‘nsorti
sugnandu pi l’Italia novi patti.
Partiu du Sud la rivoluzioni:
“Viva Caulonia, abbassu li baroni!”
Giustu lu tempu di sta dicisioni:
di Riggiu e di Roma li vonnu firmari.
Subbitu partiu la reazioni:
Ancora nun è ura di cangiari!
Truvamu prestu na soluzioni!”
La liggi è già pronta p’attaccari!
Lu sognu di riscattu caulonisi
nasciu e morsi nta lu stessu misi!
Ma pi furtuna Cavallaru ‘ntisi
mettiri fini pacificamenti
a sta rivolta, pirciò iddu decisi:
Pusamu l’armi istantaneamenti!
Sutt’o processu furu pi misi
i capi di sti grandi eventi:
resta u ricordu di sti jorna i gloria
puru si jeni sulu microstoria.
Un sulu mortu nte libri di storia
non cunta nenti comu fussi aria
ma pi cu teni ancora la memoria
sa chi Caulonia pu sud è leggendaria!
Lu cantastorie chiudi senza boria
cu na murali pocu letterata:
S’u nostru Sud nto suprusu campa
viditi ca prima o poi si stanca!
E si si stanca ripigghia la bandera
di Cavallaru e da so Russa schera!!
Questo post é stato letto 22610 volte!
