Volia mi sugnu riccu e sfundatu

e i mei ricchizzi pammi sunnu i toi

nò mi ti fai chjiù bella, ca si assai

ma mi giri ‘nt’ò mundu a undi voi.

‘Nt’à tutti i megghjiu cjiuri si na rosa

na stiglia lucenti chi no scura mai

na curuneglia d’oru e di fragranzi

chi dassa u so profumu a undi si posa.

Volia mi sugnu n’ottimu poeta

ca testa chjina di belli paroli

mi cantu a tò bellizza e i tò maneri

‘mbiatu cu è chi campa mi si godi.

Cantu cà ‘ndajiu a tia e su scialatu

cantu cà melodia d’u rusignolu

mi sentu assai felici e furtunatu

comu nu pitacuni o primu volu.

Giuseppe Cavallaro

Tratto dall’antologia“Vuci Senza Tempu”,

Unione Poeti Dialettali Calabresi