Questo post é stato letto 8360 volte!
Chi bellu ricordu chi nd’aju
‘i quand’era picciriglja!
Mi ricordu ca, ogni tantu,
eu e soruma jemu gljà nanna
Catarina, ‘a ‘bbrazzavamu,
‘a basavamu e si dicemu:
“Nanna, ndi dati deci ljri
ca volimu ‘i ndi ‘ccattamu ‘na cosa?”.
‘A nanna era ‘na fimmana arta,
bella, bruna, cu ll’occhj virdi-castani
e no’ ndi dicia mai ca no.
Lapria ‘u portegljuzzu d’a cridenza
celestri chi nd’avia ‘nt’a cucina,
pigghjava ‘na scatula ‘i landa,
‘i chiglj d’u cafè ‘i ‘na vota, a undi
tenìa ‘i sordi, ‘a lapria e nd’i dava.
Nu’ si dicemu: “Graziji, nanna”,
‘a salutavamu e subitu fujemu
‘i ndi ‘ccattamu ‘i salatini gljò barru
o l’ovu ‘i Pasca, fattu d’ostija,
gljà putiha.
E cchjù cuntenti ‘i nui, no’ nd’avìa
a nnuglju.
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 8360 volte!
