Ti cercu, di Franco Blefari. Poesia dialettale calabrese

Franco Blefari

Questo post é stato letto 5880 volte!

Ti cercu ‘nto silenziu ‘i ‘na vineglia,

rret’a ‘na porta stanca e camulijata,

undi restau ‘mpenduta ‘na padeglia

‘nta glia cucina sempi ‘mpumicata.

Ti cercu sutt’a ll’umbr’’e ‘na livara,

und’alivi cogghjevum’ a jjornata,

‘nte petri chjn’’i lippu d’’a cjumara,

und’’a stati facivi la vucata.

Ti cercu ‘nta gli cjimmarri d’Amusa,

ca mi ricordu gli jornat’‘i sugli,

sup’a glia terra margia e limacusa,

siminata di ventu e di petrugli.

Ti cercu ‘nto mercat’‘i Bovalinu,

glià bancareglia di li rrobb’usati;

gliè zingari chi leggiun’‘u distinu

‘nte mani di li poveri sciancati.

Ti cercu quandu pass’‘o matutinu,

ca quand’era d’‘i festi, a mmatinata,

mi risbigghjav’‘i sentu gliu clarinu,

cu gli canzun’‘i ll’epuca passata.

Ti cercu quandu baglian’i giacanti,

quandu son’‘a pipita ch’i piattina:

tu eri sempi ffacciata gliavanti,

pammi vidi lu rre cu la rigina.

Ti cercu quandu parti ‘nu parenti,

comu partia jeu chiglia matina:

eri malata e ti dassai ogualmenti,

non ti dissi ca vaju all’Argentina.

Ti cercu ancor’’e cchjù quand’è Natali,

mamma, ‘nta ogni prisepiu chi resta,

c’a mmenz’a gli papàtuli nostrali,

tu porti ranu, cu ‘nu saccu ‘n testa.

 

Tratto dall’antologia “Vuci Senza Tempu”,

Unione Poeti Dialettali Calabresi

 

Unione poeti dialettali di calabria

Unione poeti dialettali di calabria

 

Questo post é stato letto 5880 volte!

Author: Redazione_Cultura