Questo post é stato letto 7300 volte!
di Rocco Criseo
PRIMO MAGGIO, Festa del lavoro e giorno di riflessione e di speranza per un futuro all’insegna della meritocrazia.
U PRIMU MAGGIU
Surch’i majsi e hjuri di gerani,
batti lu suli fort’a la pendina,
è festa pe ccu ndav’i cadd’e mani,
pe ll’omu chi patìu dulur’i schina.
In giru pe li chjazz’e viculeḍḍi,
la banda son’e a ggenti si ricrjia,
nci sunnu fora giurm’e figghjoleḍḍi,
chi jocanu cuntenti pe la via.
Nte cas’è forti u hjavur’i fusiḍḍi,
ca lu passanti dassa senza hjatu,
nte bancareḍḍi, nsuḍḍi cu nuciḍḍi,
ciciri cália e zúccheru filatu.
E’ festa oji pe tutti li viḍḍani,
pe ccu si tribulau senza risparmiu,
na vita ’ntera pe nu mmors’i pani,
cu li sudur’i frunti pe guadagnu.
A fuḍḍa, nta stu’ jorn’e primavera,
a ggenti vaji arret’e sonaturi,
cu scialu jarz’o celu na bandera,
si canta l’innu di lavuraturi.
E’ jorn’i festa oji, non si lavura,
a chjazza è tutta chin’e mercanzia,
si cant’e balla sin’a tarda ura,
nc’è son’i tarantell’a ogni via.
È na jornata chist’e ncorniciari,
pe cu lottau cu forza e cu coraggiu,
mi ndavi nu lavuru pe campari:
è festa grandi di lu Primu Maggiu!
Rocco Criseo
Questo post é stato letto 7300 volte!
