Questo post é stato letto 9350 volte!
Comu ‘na sigaretta chi si fuma
e mentri ti ‘nvelena ti ricrìa,
manca cocchji tirata i si cunzuma
chidhu chi rresta di sta vita mia,
sta vita chi so’pregi e i so’ difetti,
ch’i pochi vizi chi non mi cacciài,
nottati di cafè e di sigaretti,
chi so’ mumenti belli e chi so’ guai,
ora mi porta u cuntu i chi mi detti
e u pagu ancora, puru c’o pagài
quando vitti sfumari i me’ progetti
e i sonni chi non si ‘vveràru mai;
sta vita chi mi parzi ‘na volata,
‘na venticata chi non poi mi freni,
non sacciu si fu duci o fu salata,
quantu mi fici mali e quantu beni,
sacciu ca ndeppi i curru nta nchianata,
perdìa tanti partiti e tanti treni,
‘ncuntravi milli ostaculi nta strata,
ma nuddhu e nenti potti i mi tratteni,
‘ncuntravi tanti cori e tanti porti
chi si chijudiru e mi dassaru i fora,
ma ogni vota mi sentìa cchiù forti,
catti, mi riarzài, partivi ancora,
c’a vita vali cchiù di n’avventura,
attru ca na fumata i sigaretta,
non cunta quantu è dura o quantu dura,
ma pe’ com’esti ndavi mi si ‘ccetta
e merita mi è vivuta tutta
puru s’i cosi vannu sempri a storta,
non c’esti vita bella e vita brutta
ma sulu vita viva e vita morta,
‘na vita chi ndai i vivi e mi rinnovi
sempri, puru cu cori mmorza-mmorza,
perchì quantu cchiù duri sunnu i provi
iddha tantu di cchiù ti duna forza!
Tratto dall’antologia “Vuci Senza Tempu”,
Unione Poeti Dialettali Calabresi
Questo post é stato letto 9350 volte!
