Questo post é stato letto 21250 volte!
Facitimi Sindacu, oh pòpulazziòna! / Facitimi Sindacu, a ‘sta votazziòna! / Facitimi Sindacu, …na vota e poi dui! / Facitimi Sindacu!…’u dicu ppe’ vvui! / Facitimi Sindacu si aviti interessi / ‘ma cònzu i cahòrchj, i gàviti e i cess…i! / Ca ‘…e mia nc’è bisognu nta chista città! / Dunàtimi u vòtu, si aviti pietà…! / Facitimi Sindacu ccu ‘a fàscia de tràcu!… / (d’a gioia,criditi, già ‘e ncoddhu mi cacu…) / Faciti ‘ma sentu vattira li mani / de portavaliggi, lecchini e ruffiani!… / Facitimi Sindacu ca sugnu ‘e parola!… / Facitimi Sindacu ca su’ n’omu ‘e scola: / ca eu tegnu “sapienti” financa i mutandi! / Voliti n’esempiu? …faciti domandi! / Si vui mi scriviti, eu a tutti rispundu; / vi fazzu vidira ca su’ n’òmu ‘e mundu!… / Voliti i parcheggi?… i strati puliti? / Facitimi Sindacu… e dopu ‘u viditi! / Voliti u teatru?…Voliti ‘a trambìa? / Duv’esta u problema?… Parrati ccu mia! / Cercati fatica?…’a vita vi custa? / Eu, senza ‘ma lèju, ‘u capisciu d’a “…busta”! / Voliti nu portu?…Voliti u museu? / Staciti tranquilli! …ce sugnu ccà eu! / Voliti na chjàzza a forma ‘e cacata? / Ohplà!…”Foreporti”… è già sistemata! / Voliti aparùtu u “raccordu …anulara”? / Stacitivi càrmi!… c’è ccà ‘stu cumpàra / cchi fa ‘a “tangenziala” cc’a tangenta perfetta: / m’abbasta nu picu… na pala… e ‘a mazzetta! / Vi serva nu sindacu espertu de “Pr.u.s.t.”? / L’aviti già prontu… ‘su Rambu… ‘su fust! / Voliti l’espertu do’ “…regolatora”? / Vi l’àparu tuttu!… parola d’onora! / Aviti ntasàta na fogna o u tombinu ca’ sùrici e zzòcculi nde su’ nu casinu? / Facitimi Sindacu ca haju ‘a cultura / ‘ma allargu tundini, bidè e tubatura! / Macàri vui aviti nu vunnu nto’ pettu / ca già vi futtiru Cultura e Dialettu? / ‘A delega dugnu ‘ma fa l’assessora / a nu veru tritròlu …parola d’onora! / E poi mi sbindignu ppo’ pattu cchi fici: / ripìgghju u Dialettu …cercandu i radici… / E poi vi promettu (…o ppe’ vui sugnu mortu) / ca vaju ‘e persuna ‘ma ‘i cogghju nta l’ortu! / Ca’ eu cchi su’ espertu de pinna e de storia / vi dugnu cultura cc’u “recum in gloria”! / Ca’ puru nte’ cessi de’ scoli vi piàzzu / nu libru in dialettu cchi parra do’ cazzu! / E allora votàtimi ca no’ vvu pentiti… / Su’ onestu e sinceru, amici… criditi!… / E ccà vi lu giuru supa u bbena de’ nostri:… / Facitimi Sindacu (…e su’ cazzi vostri)!
MARIO MARTINO
Questo post é stato letto 21250 volte!
